ഒരിക്കല്
പ്രഭാത നക്ഷത്രവും ഉദയ സൂര്യനും എന്നോട് ചോദിച്ചിരുന്നു
ആരാണ് 'മീനാക്ഷി'? ഞാന് അറിയില്ല എന്ന് പറഞ്ഞു .
മഞ്ഞ റോസപ്പൂക്കളെ തഴുകി വന്ന ഇളം കാറ്റും
എന്നോട് ചോദിച്ചിരുന്നു "നീ അവളെ പ്രേമിക്കുന്നുവോ? "
എന്റെ ഉത്തരം ആദ്യത്തേതു തന്നെ ആയിരുന്നു !
എന്നിട്ട് ഏകാന്തമായ പ്രപഞ്ചത്തോട് ഞാന് പാടി-
'അവള് എനിയ്ക്കു പ്രണയത്തിന്റെ ആവേഗങ്ങള് ആണ്
സ്വപ്നങ്ങളുടെ സംഗീതവും ഹൃദയത്തിന്റെ തുടിപ്പുകളും ആണ്
അവള് പരിശുദ്ധിയുടെയും പ്രേമത്തിന്റെയും മൂര്ത്തീ ഭാവമാണ് .
അവളുടെ കണ്ണുകള്ക്ക് നക്ഷത്രങ്ങളുടെ തിളക്കമുണ്ടെന്ന് എനിക്കറിയാം
പൊട്ടിചിരികള്ക്ക് മഴത്തുള്ളികളുടെ കിലുക്കവും
അവളുടെ കണ്ണുനീര് തുള്ളികളാണ് എന്റെ മുറ്റത്തെ മണ്സൂണ്
എന്നും എനിക്കറിയാം .അത്രമാത്രം !
ഇന്ന്
അവള് ആകാശ ഗംഗയില് എവിടെയോ ഒളിപ്പിക്കപ്പെട്ടിരിക്കുന്നു !
നക്ഷത്രങ്ങളുടെ തിളക്കത്തെയും,മഴത്തുള്ളികളുടെ കിലുക്കവും
എനിയ്ക്കു തിരിച്ചറിയാന് ആകുന്നില്ല ?
ചിലര് പറയുന്നു അവള് ഒരു നക്ഷത്രമായി മാറിയിരിക്കാം !
ലോകം എന്റെ പൂക്കളില് നിന്നും സുഗന്ധത്തെയും,
എന്റെ മഴവില്ലില് നിന്നും വര്ണ്ണങ്ങളെയും എടുത്തു മാറ്റിയിരിക്കുന്നു .
എന്റെ ലോകത്തിന്റെ നിറവും സുഗന്ധവും അവള് മാത്രമായിരുന്നു
എന്നതല്ലേ സത്യം ?
എന്നിട്ടും എനിയ്ക്കു ചുറ്റും മണ്സൂണ് മാത്രം ഇന്നും പെയ്തൊഴിയുന്നു .
കണ്ണുനീര് എന്റെ ആണെന്ന് മാത്രം !
ഒരു നാള്
ഈ ഏകാന്ത ലോകം വിട്ടു ഞാനും പോകും
ഒരു ആത്മാവ് കൂടെ ആകാശ ഗംഗയിലേക്ക് സ്വാഗതം ചെയ്യപ്പെടും
മഴമേഘങ്ങള് എന്റെ ചൈതന്യത്തെ കഴുകി ശുദ്ധമാക്കും
ഒഴുകി ഒലിക്കുന്ന നിറ നിലാവ് എന്റെ കുപ്പയമാക്കപ്പെടും
അങ്ങിനെ ഞാനും ഒരു നക്ഷത്രമാക്കപ്പെടും !
എന്റെ ലോകമേ ,അന്നു നീ കാണുക,കേള്ക്കുക എന്റെ പ്രണയം
മീനാക്ഷി ആരാണെന്നും അന്നു മാത്രം നീ അറിയുക
അതുവരെ സ്വപ്നങ്ങളും രഹസ്യങ്ങളും എന്റെ മാത്രമാണ്
എന്റെ മാത്രം !!!
ormakal.. meenakshi... nammude aa pazhaya hostel muriyil ippozhum undo aavo??
ReplyDelete